Bilde av br. 1-3

Namn og namngjeving

Stadnamn er namn på geografiske lokalitetar av alle slag. Det er vanleg å dela stadnamna inn i gruppene naturnamn, kulturnamn og personnamn. Til den første gruppa høyrer namn som er knytta til ulike naturlege formasjonar, stormyra og Haugane kan nemnast som døme. Kulturnamn fortel om kulturen eller vitnar om menneskeleg verksemd. Døme på  kulturnamn frå Nedretveit er Florsbrekka og Skarsvegen. Stadnamn som  har tilknytning til personnamn, kjem inn i den siste gruppa. Som ein ser er ein god del av stadnamna samansette, og seinare i oppgåva vil ein  sjå at dette først og fremst gjeld kulturnamna.

Stadnamna er viktige som kulturhistorisk kjeldemateriale, og kan fortelja om rydding, busetnad og driftsformer. Namna fortel om dyra og menneska som har levd på gardane opp gjennom åra.

Kor mange stadnamn det er eller har vore i Noreg kan ingen seia visst,  men for 100 år sidan var det truleg mellom fem  og ti millionar namn. Sidan den gong har antallet blitt sterkt redusert. Avvikling av utmarksdrift, mekanisering av jordbruket, motorisering av samferdsla og  krav til større effektivitet er årsakene til at mange namn har gått tapt.  Namn på haugar, sletter, åkerlappar og teigar, og kløvjevegar og stigar har også falle bort. Før hadde ein namn på alle stadene, medan ein no heimfestar dei fleste stadene ved hjelp av preposisjonar som bortom løa og framfor skykka.

Bruk nr. 1

Namn: Andersåkeren
Uttale: Andersåkern
Preposisjon: i
Kartnummer:43
Type namn: Personnamn
Topografi: Ein svakt vesthallande bakke oppå eit brotelag.
Etymologi: Namnet kjem av at ein Anders f. 1725 hadde åkeren sin her.

Namn: Askegjøtene
Uttale: Askegøtna
Preposisjon: i
Kartnummer: 24
Type namn: Naturnamn
Det står blandt anna ein stor ask i denne hallande bakken, som ligg ovanfor store brot.
Etymologi: Forstavinga kjem av at det har vakse, og veks, ask her.  Gjøtene er fleirtal av gjøte, og området ser ut som ei gjøte

Namn: Askegotebrotet
Uttale: Askegøtebrøte
Preposisjon: i
Kartnummer: 25
Type namn: Naturnamn
Topografi: Det er eit bergbrot som skil Askegjøtene frå Søre Brekkene
Etymologi: Namnet kjem av at brotet ligg nedanfor Askegjøtene

Namn: Askåkeren
Uttale: Askåkern
Preposisjon: i
Kartnummer: 42
Type namn: Kulturnamn
Topografi: Det er eit lite område som er oppstøtta av mur. Området ligg på venstre sida av vegen som går på Sjuraheia.
Etymologi: Namnet kjem seg av at denne åkeren låg mellom mange askar

Namn: Balane
Uttale: Balane
Preposisjon: i
Kartnummer: 59
Type namn: Kulturnamn
Topografi: Bratt bergparti der det også veks lauvskog.
Etymologi: Namnet kjem av at det er bratt her, og såleis bale å komme opp.

Namn:  Brattåker
Uttale: Brattækro
Preposisjon: i
Kartnummer: 56
Type namn: Kulturnamn
Topografi: Nordhallande grasbakke som går opp mot Strupahugen
Etymologi: Namnet kjem av at det har lagt ein åker i denne bakken

Namn: Nordre Brekkene
Uttale: Nore brekkena
Preposisjon: i
Kartnummer: 18
Type namn: Naturnamn
Topografi: Bratt bakke som går ned mot Dalen, og opp på Heia.
Etymologi: Namnet kjem av at denne bakken, som så mange andre på garden, er veldig bratt.

Namn :Bringa
Uttale: Bringo
Preposisjon: i
Kartnummer: 50
Type namn: Naturnamn
Topografi: Sørhallande bakke som går opp mot Løhaugen.
Etymologi:Namnet kjem av at bakken ser ut som kroppsdelen bringa.

På bilete ser ein Bringa, og parasellen under Bringa. Huset som ein ser står på Løhaugen

Namn: Broka
Uttale: Brokjæ
Preposisjon: i
Kartnummer: 57
Type namn: Naturnamn
Topografi: Hallande bakke som er delvis delt av eit berg.
Etymologi: Parasellen var ein åker som særleg vart brukt til å setja poteter i. Midt i åkeren er det eit berg som gjorde at åkeren såg ut som ei bukse.

Namn: Dalen
Uttale: Daln
Preposisjon: i
Kartnummer: 48
Type namn: Naturnamn
Topografi: Dyrka mark med brekker mot aust og vest.
Etymologi: Namnet kjem av at parasellen er ei flate med bratte bakkar på begge  sidene, og ser dermed ut som ein dal.

Dalen

Namn: Døsi
Uttale: Døsi
Preposisjon: i
Kartnummer: 11
Type namn: Kulturnamn
Topografi: Her er det i dag bringebæråker
Etymologi:Det er uklart kva dette namnet kan komma av, men at dei under oppdyrkinga av Myrane i 1930-åra gjekk opp hit for  å kvila når dei var trøtte og døsige er ikkje utenkeleg.

Midt på bilete ser ein området Døsi. I nedre biletkant ser ein delar av Myrane. Ein ser delar av bruk 2, og garden Øvretveit i øvre delen av bilete.

Namn: Ervesfallet
Uttale: Ervesfallet
Preposisjon:på
Kartnummer: 6
Type namn: Kulturnamn
Topografi: Området dekkar omlag ein ar og ligg på kanten ovanfor Nordre Brekkene. Området er i dag tilplanta med gran, men desse er ikkje så store enno. Då stykker vart oppdyrka var marka omkring udyrka, og det området vart ikkje oppdyrka før i dette hundreåret. Ervesfallet har truleg vore brukt til kornåker, då det har vore eit godt stykke med svært god solvarme.
Etymologi: Erves kjem av at området har vorte arva i eldre tider. Fallet kjem av at stykket ligg på kanten av den stupbratte brekka.

Namn: Gjertrudgjerdet
Uttale: Gjertrugjere
Preposisjon: i
Kartnummer: 21
Type namn: Personnamn
Topografi: Teigen er omlag femten meter lang og har ei breidde på mellom to og fire meter.
Etymologi: Namnet kjem av at Gjertrud f. 1874 som hadde opphald hjå far sin, hadde åkeren sin her medan ho levde.

Her ser ein Gjertrudgjerdet nærast, og delar av Gravhalsen midt på
bilete. Trea øverst på bilete tilhøyrer Ranen.

Namn: Gravhalsen
Uttale: Gravhalsn
Preposisjon: i
Kartnummer: 20
Type namn: Naturnamn
Topografi: Smal avskt sørhallande bakke som ligg mellom to brotelag.
Etymologi: Namnet kjem nok av at dei i eldre tider har synest at her er like smalt og trangt som i ei grav.

Namn: Heiabrua
Uttale: Heibrunæ
Preposisjon: på
Kartnummer: 35
Type namn: Naturnamn
Topografi: Ein parasell  mot vest som ligg litt høgare enn resten  søre av Heiamyra.
Etymologi: Namnet kjem av at dei her kunne gå tørrskodd, og at her var mindre vatn enn ellers på myra. Heia kjem av at før i tida var dette ein del av det udyrka området mellom Tveitegrend og Haugsdalen.

Namn: Nordre Heiadalen
Uttale:Nore Heiadaln
Preposisjon: i
Kartnummer: 3
Type namn: Naturnamn
Topografi: Området ligg nedanfor ein austvendt bakke, som går frå sjølve Heia.
Etymologi: Eit lite dalsokk aust på Heia.

Namn: Nordre Heiamyra
Uttale: Nore heiamyrne
Preposisjon: på
Kartnummer: 7
Type namn: Naturnamn
Topografi: Ei oppdyrka “flate” med mange store og små krumningar på.
Etymologi: Namnet kjem av at dette nok har vore ei stor myr.

Her ser ein delar av Nordre Heiamyra

Namn: Heiavegen
Uttale: Heiaveien
Preposisjon: i
Kartnummer: 32
Type namn:  Kulturnamn
Topografi: Svingete grusveg som går frå tunet, ned i Dalen, og på mot Heia via Brekkene. Det er også denne vegen som deler Nordre og Søre Brekkene.
Etymologi: Vegen har fått dette namnet ettersom den går opp på Heia.

På bilete ser ein korleis Heiavegen deler Nordre og Søre Brekkene. Ein ser og Askegotebrotet oppe i Søre Brekkene. Oppe i svingen i brekkene ser ein delar av Kroken.

Namn: Heiaåkeren
Uttale:Heiaåkern
Preposisjon: i
Kartnummer: 53
Type namn: Kulturnamn
Topografi: Etter forholda eit stort område som går frå vegen på Sjuraheia i vest, og Balane i aust. Store delar av området hallar mot søraust.
Etymologi: åker som har vore på Sjuraheia.

Namn: Hesthola
Uttale: Hesthølo
Preposisjon: i
Kartnummer: 60
Type namn: Kulturnamn
Topografi: Ei kupert hole der alle andre bakkar endar.
Etymologi: Namnet kjem av at her var beitet til hesten.

Namn: Kjeldeplassen
Uttale: Kjelleplassn
Preposisjon: på
Kartnummer: 49
Type namn: Kulturnamn
Topografi: Svakt vesthallande bakke med eit inngjerda område som inneheld kjelda.
Etymologi: Her er vasskjelda til det gamle huset på garden.

Namn: Kjeldebrota
Uttale: Kjellebroti
Preposisjon: i
Kartnummer: 39
Type namn: Kulturnamn
Topografi: Stupbratt bergparti som skil Søre Brekkene og Heiabrua.
Etymologi: Namnet kjem av at det her låg ei kjelde som fleire på Nedretveit hadde rett til å bruka når dei vart vasslause i sine eigne brønnar.

Namn: Kjellåkerbakken
Uttale: Kjellåkerbakken
Preposisjon: i
Kartnummer: 32
Type namn: Kulturnamn
Topografi: Liten bakke som er ein del av Søre Brekkene.
Etymologi: Namnet kjem av at dette er ein oppdyrka bakke som ligg nord for ei kjelde som låg her i gamle dagar.

Namn: Kleiva 
Uttale: Kleivi
Preposisjon: i
Kartnummer: 30
Type namn: Naturnamn
Topografi: Bratt gongsti som går mellom bruk ein og bruk to.
Etymologi: Kjem av gamalnorsk kleif, som tyder bratt.

Namn: Klungeråkeren
Uttale: Klongeråkern
Preposisjon: i
Kartnummer: 37
Type namn: Kulturnamn
Topografi: Lita flate som ligg mellom to brotelag.
Etymologi: Dette kjem av at det i nærleiken av åkeren var mykje klunger.

Midt på bilete ser ein kvar Klungeråkeren låg. Ein ser også Raunhaugen til
venstre, og fiskerøykeriet.

Namn: Kongsslottet
Uttale: Kongsslåtte
Preposisjon: ved
Kartnummer: 28
Type namn: Naturnamn
Topografi: Steinen er skild i frå berget, slik at det er mogeleg å gå mellom steinen og berget.
Etymologi: Namnet kjem av at ungane i eldre tider tykkte denne steine  var stor som eit kongeslott.

Namn: Kringen
Uttale: Kringen
Preposisjon: i
Kartnummer: 41
Type namn: Kulturnamn
Topografi: Vegen som går frå hovudvegen og bort til den eldre delen av tunet.
Etymologi: Det er små svingar bortetter vegen, som gjer han kronglete.

Namn: Kroken
Uttale: Kroken
Preposisjon: i
Kartnummer: 19
Type namn: Kulturnamn
Topografi: Det er ein sving i vegen opp til Heia, som ligg med
under brotelag mot nord og aust.
Etymologi: Svingen er som ein krok på vegen, og den ligg med bergvegg mot nord og aust.

Namn: Krosshaugen
Uttale: Krosshauen
Preposisjon: på
Kartnummer: 40
Type namn: Kulturnamn
Topografi: Ein haug som ligg der gardsvegen tek av frå hovudvegen.
Etymologi: Namnet kjem av vegkrysset som legg ved haugen.

Krosshaugen sett ovanfrå. Flatene og husa på andre sida av vegen tilhøyrer bnr. 3.

Namn: Langåkerbakken
Uttale: Långåkerbakken
Preposisjon: i
Kartnummer: 13
Type  namn: Kulturnam
Topografi: Denne parasellen ligg midt i Nordre Brekkene.
Etymologi: åkeren som har vore i denne bakken har nok vore like lang som bakken, og dermed ganske lang.

Namn: Løhaugbrekka
Uttale: Løhaubrekko
Preposisjon: i
Kartnummer: 45
Type  namn: Kulturnamn
Topografi: Brekke som ligg mellom eit av dei gamle uthusa og det nye
bustadhuset. Brekka hallar ned mot Dalen.
Etymologi: Bratt bakke som går oppover til Løhaugen.

Namn: Løhaugen
Uttale: Løhauen
Preposisjon: på
Kartnummer: 44
Type  namn: Kulturnamn
Topografi: Her står i dag det “nye” bustadhuset.
Etymologi: Namnet kjem av at det her i eldre tider har stått ei løe.

Namn: Maurhola
Uttale: Maurhølo
Preposisjon: i
Kartnummer: 29
Type namn: Naturnamn
Topografi: Lita søraustvendt fordjuping.
Etymologi: I denne hola har det nok vore fleire maurtuer, og såleis mykje maur.

Namn: Myrane
Uttale: Myrane
Preposisjon: på
Kartnummer: 17
Type namn: Naturnamn
Topografi: Ei stor flate som blir brukt som slåttemark. Går frå Heiavegan mot Øvretveit.
Etymologi: Kjem av at området har vore ei myr før det vart oppdyrka.

Namn: Ranen
Uttale: Ran
Preposisjon: i
Kartnummer: 22
Type namn: Naturnamn
Topografi: Ein stor haug som i dag er dekka hovudsakleg av lauvskog, og området blir brukt som beite om sommaren.
Etymologi: Namnet kjem av rand, og peikar på kantane som omgjev haugen.

Namn: Raunhaugen
Uttale: Raunhauen
Preposisjon: på
Kartnummer: 23
Type namn: Naturnamn
Topografi: Liten avlang haug med eit brotelag ned mot Myrane.
Etymologi: På denne haugen har det nok vakse mykje raun.

Namn: Regnbrekkene
Uttale: Regnbrekkena
Preposisjon: i
Kartnummer: 52
Type namn: Naturnamn
Topografi: Bratt bakke med mykje berg og mange grastuer. Går frå strupen og opp på Sjuraheia.
Etymologi: Her er mykje berg, lite jord og mange hyller og holer, så det samlar seg opp vatn i denne bakken når det regnar.

Namn: Rullebrekka
Uttale: Rullebrekko
Preposisjon: i
Kartnummer: 31
Type namn: Kulturnamn
Topografi: Bakke som går opp mot gamleløa. I dag ligg den nye løa i denne bakken.
Etymologi: Namnet kjem nok av at dei syntest denne bakken var lett å dette og rulle  her.

Namn: Ryggen
Uttale: Ryggjen
Preposisjon: på
Kartnummer: 15
Type namn: Naturnamn
Topografi: Langt brotelag
Etymologi:  Namnet Rygg blir ofte
brukt om lange, smale høgder.

Her ser ein Nordre Nedre heiamyra. Til venstre mellom lauvtrea ligg
Ervesfallet, og til høgre ser ein Ryggen.

Namn: Seljeflekken
Uttale: Seljeflekken
Preposisjon: på
Kartnummer: 14
Type namn: Kulturnamn
Topografi: Dette området ligg i Nordre Brekkene, og hallar ned mot ein avsats. Seljeflekken er i dag  berre grasmark som området rundt, men den har vore åker i lange tider, og då først og fremst potetåker. Seljeflekken har alltid vore ein god åker. Jordsmonnet er svært godt, og det har aldri mangla jord. Seljeflekken har vorte oppdyrka lenge før andre delar av bruket. I eldre tider var det mange slike små åkrar rundt om på gardane, og det blei vekselsvis dyrka ulike vekstar i dei ulike åkrane.
Etymologi: Namnet kjem av at det voks selje i Brekkene i eldre tider, og at Seljeflekken er eit område  som vart rydda for trær og så dyrka opp til åker.

Namn: Sjøleet
Uttale: Sjolee
Preposisjon: ved
Kartnummer: 4
Type  namn: Kulturnamn
Topografi: Her er ei grind på snarvegen om Heia. Snarvegane frå Øvretveit og Nedretveit møtest her.
Etymologi: Namnet kjem seg av at dei brukte denne vegen, og måtte gjennom denne grinda, for å komma til sjøen.

Namn: Sjolekleiva
Uttale: Sjolekleivi
Preposisjon: i
Kartnummer: 8
Type  namn: Kulturnamn
Topografi: Veg frå Sjoleet og opp på Heia.
Etymologi: Namnet kjem av at dette var ein bakke som dei måtte gå opp når dei kom i frå sjøen, og hadde gått gjennom leet.

Namn: Sjuraheia
Uttale: Sjuraheie
Preposisjon:på
Kartnummer: 47
Type  namn: Personnamn
Topografi: Stor haug med bratte kantar mot sør og vest.
Etymologi: Namnet kjem av at dette området før utskiftinga i 1936 tilhøyrde bnr. to, der Sjur hadde vore eigar.

Namn: Strupen
Uttale: Strupen
Preposisjon: i
Kartnummer: 55
Type  namn: Naturnamn
Topografi: Parasellen går frå Ura mot garden Fammestad.
Etymologi: Namnet kjem av at området stadvis er veldig smalt.

Namn:Tone
Uttale: Tonæ
Preposisjon: i
Kartnummer: 26
Type  namn: Naturnamn
Topografi: Smal teig som går mellom to brotelag. Her går det an å gå opp på Heia.
Etymologi: Kjem av at parasellen ligg mellom to brotelag, eller ne.

Namn: Tusselia
Uttale: Tusselie
Preposisjon: i
Kartnummer: 2
Type  namn: Kulturnamn
Topografi: Stein og trefylt austhallande bakke.
Etymologi: Ein har nok trudd at ein har sett tussar og andre underjordiske vesen i denne bakken.

Namn: Tøpta
Uttale: Tøptæ
Preposisjon: på
Kartnummer: 36
Type  namn: Kulturnamn
Topografi: Ei flate, og del av ei helling mot sør.
Etymologi: Her stod husa til alle gardane på Nedretveit.

Namn: Ura
Uttale: Uri
Preposisjon: i
Kartnummer: 54
Type  namn: Naturnamn
Topografi: Området ligg under eit stort brotelag, og er no stort sett overgrodd med kratt.
Etymologi: Då staden fekk namnet var steinrøysa synleg.

Bruk nr. 2

Namn: Florsbrekka
Uttale: Florsbrekko
Preposisjon: i
Kartnummer: 72
Type namn: Kulturnamn
Topografi: Ein av dei bratte bakkane ned mot skaret.
Etymologi: Sannsynlegvis har det vore ein gamal flor oppe på toppen av denne bratte bakken.

Namn: Geila
Uttale: Geili
Preposisjon: i
Kartnummer: 65
Type namn: Kulturnamn
Topografi: Svingete veg opp mot Tødnhaugen, som vert nytta som beite.
Etymologi: Namnet er fleirtal av geil som tyder inngjerd krøtterveg.

Namn: Gjøtene
Uttale: Gøtna
Preposisjon: i
Kartnummer: 74
Type namn: Kulturnamn
Topografi: Bratt bakke.
Etymologi: Namnet på ein gangsti som gjekk her før. Namnet kjem av at det var så bratt at stien fekk vart forma som ei gjøte.

Namn: Haugane
Uttale: Hauane
Preposisjon: på
Kartnummer: 73
Type namn: Naturnamn
Topografi: Svært kupert terreng.
Etymologi: Kjem av at det er mange haugar.

Namn: Leitehola
Uttale: Leitehølo
Preposisjon: i
Kartnummer: 69
Type namn: Naturnamn
Topografi: Sirkelforma parti med Leitehola lengst nede.
Etymologi: Dette kjem av at det er ei fordjupning oppe på Leitet.

Namn: Leitet
Uttale: Leite
Preposisjon: på
Kartnummer: 68
Type namn: Naturnamn
Topografi: Austhallande flate med nokre krumningar på. Utsyn over Tveitavatnet.
Etymologi: Kjem av  gamalnorsk leiti, som tyder høgd eller bakke som gjev utsyn.

Namn: Mollberget
Uttale: Mållberge
Preposisjon: på
Kartnummer: 66
Type namn: Kulturnamn
Topografi: Her går no køyrebrua inn i løa på bruk to.
Etymologi: På dette berget tørka dei mold, og den molda vart lagt i kurenna inne i fjøsen der den trakk til seg væta. Denne molda var viktig som gjødsel ute på marka.

Namn: Skaret
Uttale: Skaræ
Preposisjon: oppå
Kartnummer: 70
Type namn: Naturnamn
Topografi: Ei flate som ligg på toppen av skarsvegen.
Etymologi: Namnet kjem av at ein kjem opp til denne flata etter å ha gått gjennom eit skar i vegen.

Namn: Skarsvegen
Uttale: Skarsveien
Preposisjon: i
Kartnummer: 71
Type namn: Kulturnamn
Topografi:  Bratt veg gjennom eit
skar. Vegen blir brukt når ein skal til Vatnet.
Etymologi: Namnet kjem av skaret som vegen går gjennom.

Her ser ein delar av skarsvegen, og midt på bilete ser ein skaret.

Namn: Stølen
Uttale: Støln
Preposisjon: på
Kartnummer: 62
Type  namn: Kulturnamn
Topografi: Grasdekka bakke som ligg på grensa mot Øvretveit.
Etymologi: Namnet kjem av at her mjølka dei kyrne før i tida.

Like til venstre for løetaket som ei såvidt skimtar, ser ein Stølen. Nærast ser ein delar av Todnhaugen.

Namn: Tødnhaugen
Uttale: Tødnhauen
Preposisjon: på
Kartnummer: 64
Type namn: Naturnamn
Topografi: Område med skiftevis gras og berg.
Etymologi: Tødnhaugen kjem av tørrhaugen, dette fordi jorda var grunn her, og haugen vart difor tørr.

Namn: Uratre
Uttale: Uratræ
Preposisjon: på
Kartnummer: 67
Type  namn: Kulturnamn
Topografi: Stor flate, lengst mot vest går no hovudvegen.
Etymologi: Namnet kjem av at dette området i eldre tider var eigd av bnr. fire og fem, som vart kalla Urabruka, eller dei i treet.

På bilete ser ein dei gamle husa på bnr. 2. Til høgre for husa ligg Uratre.

Bruk nr. 3

Namn: Bjønfokhaugen
Uttale: Bjønfokhaugen
Preposisjon: på
Kartnummer: 83
Type namn: Naturnamn
Topografi: Liten ås, ca 50 meter lang.
Etymologi: Namnet kjem av at haugen er forma som ein stor fot, og dermed ein bjørnefot.

Namn: Britaåkeren
Uttale: Britaåkern
Preposisjon: i
Kartnummer: 88
Type namn: Personnamn
Topografi: Lita flate nesten på toppen av Hovden.
Etymologi: Namnet kjem av at Brita f. 1845 hadde åkeren
sin her.

Namn:Dauren
Uttale:Daurn
Preposisjon: i
Kartnummer: 81
Type namn: Kulturnamn
Topografi: Bratt brekke.
Etymologi: Namnet kjem av at dette var eit stykke som vart påbyrja før frokost under innhaustinga.

Nederst på bilete ser ein Britaåkeren, og lenger oppe ser ein toppen
på Hovden.

Namn: Doneberget
Uttale: Doneberge
Preposisjon: på
Kartnummer: 94
Type namn: Kulturnamn
Topografi: Eit 15 meter langt bergparti, med utsikt og brotelag mot vest.
Etymologi: Namnet kjem av at dei på dette berget la ut snare, med for eksempel rognebær som lokkemat, for å fanga trost og andre småfuglar.

Namn: Halsåkerskaret
Uttale: Halsækerskare
Preposisjon: i
Kartnummer: 84
Type namn: Kulturnamn
Topografi: Lita flate som grensar mot ein bakke mot vest, og har berg i sør og nord.
Etymologi: I dette skaret har det berre vore plass til ein smal åker.

Namn: Hovden
Uttale: Håvdn
Preposisjon: i
Kartnummer: 92
Type namn: Naturnamn
Topografi: Markert stor haug med bratte kantar på alle sider.
Etymologi: Kjem av det gno. for hovud, namnet blir ofte brukt om frittståande berghaugar som her.

Namn: Kringlo
Uttale: Kringlo
Preposisjon: på
Kartnummer: 80
Type namn: Naturnamn
Topografi: Veldig lita flate som er omgitt med små hellingar.
Etymologi: Kjem av at denne flata er omgitt av små haugar og bakkar.

Namn: Kupo
Uttale: Kupo
Preposisjon: i
Kartnummer: 93
Type namn: Naturnamn
Topografi: Liten kulp der Myraleitet sluttar.
Etymologi: Kupo betyr rundt kar eller skål og såleis har denne kulpen fått namnet.

Namn: Lia
Uttale: Lie
Preposisjon: i
Kartnummer: 85
Type namn: Naturnamn
Topografi:  Bratt bakke fyllt for det meste med lauvtre.
Etymologi: Ei li er det samme som ein bakke.

Namn: Myrleitet
Uttale: Myrleite
Preposisjon: på
Kartnummer: 91
Type namn: Naturnamn
Topografi: Lita flate lengat sør på ei stor myr.
Etymologi: Går ein lengst mot sør har det nok vore god utsikt før skogen voks opp.

Her ser ein delar av Lia, og nærast ser ein delar av Tønnebrekka.

Namn:Storåkeren
Uttale: Storåkern
Preposisjon: i
Kartnummer: 78
Type namn: Kulturnamn
Topografi: Stor flate som bli brukt som slåttemark.
Etymologi: Her har det vore ein stor åker.

Til høgre ser ein delar av Storåkeren. Husa er det
gamle huset og løa på bruket. I bakgrunnen ser ein Hovden.


Namn: Tjukkestykket
Uttale: Tjokkastykkje
Preposisjon: i
Kartnummer: 79
Type namn: Naturnamn
Topografi: Del av Veiamyra. Svakt sørhallande, og grensar mot hovudvegen i aust.
Etymologi: Namnet kjem av at dette var eit stykke der graset voks godt.

Namn: Tønnebrekka
Uttale: Tudnebrekko
Preposisjon: i
Kartnummer: 86
Type namn: Naturnamn
Topografi: Stor austhallande brekke som går ned frå Halsækerskaret.
Etymologi: I området blir tynn uttala som ein mellomting mellom tønn og tunn, og namnet kjem difor av at det var lite gras i denne austvendte bakken.

Namn: Veiamyra
Uttale: Veiamyrne
Preposisjon: på
Kartnummer: 87
Type namn: Kulturnamn
Topografi: Stor flate som endar ut ved myraleitet i sør, hovudvegen i nordaust, tunet i nord og Lia i vest.
Etymologi: Før vegen kom vart parasellen berre kalla myra, og namnet  kjem av at vegen går lengst aust på denne myra.